Það er nóg um að vera hjá okkur þessa dagana og vikurnar. Fimmtudaginn 9. febrúar höldum við okkar árlega þorrablót og undirbúa börnin sig þannig að þau læra hina ýmsu söngva sem tilheyra þorranum ásamt því að skreyta "víkingahjálma" sem þau verða með á þorrablótinu. Matur verður að sjálfsögðu hefðbundinn þorramatur.

Við höfum svo lokað salnum fyrir hefðbunndinni dagskrá þ.e.a.s. einingakubbar og hreyfistundir þar sem hann er undirlagður búningagerð fram að öskudegi sem verður 22. febrúar. Að vanda hanna börnin sjálf búningana og búa til með dyggri aðstoð kennaranna. Ljóst er að sköpunarkraftur barna og kennara er mikill og þessi búningagerð alltaf nokkuð tilhlökkunarefni. Á öskudag viljum því ekki að börnin komi með búninga að heiman. Rétt er að minna svo á að við tökum gjarnan á móti skemmtilegum efnisbútum til að nota í búninganna. Ónýtt efni er því alls ekki ónýtt fyrir okkur.

Samhliða þessu og okkar hefðbundna starfi þá eru börnin að fræðast sérstaklega um vatn og einhver farin að gera hinar ýmsu tilraunir með vatn til að glöggva sig á því. Eins og fram hefur komið þá er vatn meginþema okkar næsta eina og hálfa árið í grænfánaverkefninu. Í Comeníusarverkefninu höfum við svo verið að lesa Nasredin söguna um ketilinn. Skólinn í Tyrklandi endurskrifaði hana og við fengum svo það hlutverk að myndskreyta söguna sem börnin á öllum deildum gerðu með miklum sóma.

Við minnum svo að lokum á náttfatadaginn sem er á morgun, föstudaginn 3. febrúar. Í skóladagatalinu sem er að finna í flipunum hér að ofan er hægt að skoða og sjá viðburði sem verða á Mýri fram á sumar.